早幾個月前發表嘅台灣製作恐怖解謎遊戲《LIGHT：Black Cat & Amnesia Girl》畫風人設可愛，氣氛營造亦都做得唔錯而備受玩家們注意，日前終於推出免費試玩版，玩家終於可以體驗扮演小黑貓逃離恐怖大宅嘅過程！

《LIGHT：Black Cat & Amnesia Girl》由台灣獨立工作室「DayLight Studio」開發，係一款恐怖解謎冒險遊戲，採用第三身視點。玩家將扮演一隻神秘小黑貓，帶領失去記憶嘅小女孩，逃出滿佈謎題以及黑暗怪物無處不在嘅大宅。由於玩家只係一隻貓，所以可做嘅事情有限，例如小心觀察四周，尋找可躲藏嘅位置，再發出叫聲引導小女孩躲藏等等，亦有機會因為不小心做錯決定而導致小女孩同你死亡。

根據作品描述，完成版將包含宅邸、地底、遺跡等四大關卡，而今次嘅免費體驗版只係第一關三分之一嘅內容，遊玩內容主要係避開黑色管家怪物，一邊躲藏一邊尋找出口。遊戲基本玩法都係透過與場景物品及機關互動，例如係推下木箱轉下轉盤之類，難度不高，而且解謎點附近都有明顯提示。

《LIGHT：Black Cat & Amnesia Girl》預計於今年內進行搶先體驗，現時已提供免費試玩版下載，暫時只有 PC Steam 平台，預計之後會有 PS 及 Nintendo Switch 版本，支援繁體中文。