《Project Winter》、《Among Us》等狼人殺類遊戲大受歡迎，自然令更多團隊製作同類型作品。今次介紹嘅新作《Dread Hunger》就係一款加入生存要素嘅狼人殺類遊戲，要一邊搵野食保暖求存，同時又要慎防隊友喺後面捅你一刀，忙得黎緊張刺激，極適合一班朋友遊玩。

《Dread Hunger》由 Dread Hunger Team 開發，係一款生存策略遊戲，採用第一身視點，支援最多六人同遊。本作最大嘅特色係將狼人殺玩法溝埋生存遊戲要素，玩家們要透過探索收集物資，又要同野生動物、食人族博鬥，同時又要防背叛者喺你後面搞事。基本上玩家們就係要 Keep 住唔知應該信邊個嘅情況下，與其他人合力求生，同時要為你認為嘅內奸提供虛假嘅情報，整個過程充滿住猜疑、沮喪、刺激，識玩之後極度上癮。

作為一款狼人殺遊戲，每位玩家都會扮演船長、領航員、廚師、醫師、牧師、皇家海軍、獵人、工程師其中一個職業，每個角色都擁有獨特初始裝備及被動能力，例如船長可製作最強近戰武器、皇家海軍開場已經有槍用等等，但係有武器並唔係大晒，為咗應付寒冷嘅天氣，燈籠、煤炭、斧頭呢類工具先可以令你生存落去，所以有武器嘅玩家需要保護其他人採集資源、獵殺動物確保食物，而背叛者自然係要從中作梗，務求令到探險隊全滅。

兩邊隊伍各有任務需要達成，好人一方目標係將船駛離極地，事前需要拎到硝化甘油炸開擋路冰山，以及儲夠煤炭提供船航行嘅動力。至於壞人一方自然係要以任何方法殺晒好人，又或者炸沉隻船等。為咗有效達成目標，遊戲內建嘅語音溝通係必定會用到嘅功能，系統會因應玩家距離調整，距離太遠嘅人係聽唔到對話內容的。有趣嘅係壞人一方可以用暗號對彼此發出指示，私下溝通前亦可用技能「靈視」確認附近有無人偷聽，以防身份曝光。

除咗上面各項基本玩法，遊戲仲有個設定非常有趣。當玩家缺乏食物時，為求溫飽，可以食由屍體所烹調嘅料理，當食人肉去到一定程度後，飽食度 Icon 會變成手，代表你已經對人肉上癮。當出現呢個 Debuff 後，一般食物會變得難以恢復飽食度，只有持續進食人肉先得。但係現行版本只要有人肉供應就可確保飽食度兼無任何負面效果，只要將屍體分屍就可以提供大量食物，變相無需狩獵野獸，呢點就有啲破壞平衡了。

《Dread Hunger》已於 1 月 27 日推出，對應平台為 PC Steam，支援繁體中文。由於遊戲內教學做得非常麻麻，有其他玩家自行製作簡單教學，有興趣玩嘅朋友可先行研讀再入遊戲實戰。