唔知大家有無睇過啲用高壓水槍做清潔嘅片，睇住逐 Part 由勁污糟變返乾淨，果種感覺真係好治癒。喺舊年就出咗款玩高壓水槍做清潔嘅遊戲《PowerWash Simulator》，完全係 For 你減壓輕鬆用，仲可以夾埋幾個朋友一齊射，真係可以晚晚射完好滿足咁瞓覺！

《PowerWash Simulator》由獨立團隊 FuturLab 開發，係一款休閒模擬遊戲，採用第一身視點，支援線上最多六人同遊。遊戲玩法好簡單，就係用高壓水槍射走啲污漬，但係面對塗鴉、青苔、黴菌、生銹等各種不同程度嘅漬，自然要配合返唔同嘅噴嘴、噴槍，之後更會有需要用到更高水壓嘅污漬，就要更換更強力嘅型號再加清潔劑去對付。至於地圖亦非常多元化，洗車洗船洗行人路當然有，最神奇係可以洗到去火星……。

既然講到明係紓壓 Game，喺職業模式及自由模式中不但可多人合作，更完全無任何時間限制或者最終得分，有既只係滿滿嘅治癒感，而喺職業模式入面就可以慢慢建立自己業務，購買更多嘅工具一步步成長。當然，想挑戰自己嘅仲有限時嘅「Time Challenge」，又或者鬥用得少水嘅「Water Challenge」，任君選擇。

《PowerWash Simulator》已經推出，對應平台為 Xbox Series X|S、Xbox One 及 PC Steam，並已納入 Xbox Game Pass。遊戲現時處於搶先體驗階段，Keep 住有更新，例如早前就新增遊樂場地圖及一堆新道具。