過去兩年全世界都因為武肺肆虐，導致大家不論生活、工作、環境等都大受影響。波蘭製作嘅新作《Forever Skyies》就係描寫未來嘅地球被毒霧所濃罩，摧毀整個地球生態，成個設定係咪熟口熟面呢，話唔定係我哋未來嘅寫照！

《Forever Skyies》由波蘭開發商 Far From Home 製作，係一款生存建設遊戲，採用第一身視點，支援多人合作遊玩。故事講述地球表面被一層巨大嘅毒雲所覆蓋，全球生態已被摧毀變得不適合人類居住，倖存嘅人類人此移民至外星。幾百年後，呢班倖存者受到不明嘅疾病襲擊，所以決定重返離開多年嘅地球，喺毒雲下尋找一切有用之物。

因為地球表面仍然被毒雲籠罩，所以落返地球時會喺廢棄大樓頂層降落。玩家要喺廢墟入面探索，尋找資源帶返去你嘅基地，以高科技去研究、分解呢啲物質，再重組成各種工具、強化改做飛船及製作機器 ，再用佢哋進行逆向工程重現失落嘅技術。當然仲要兼顧獲取食物同資源嘅方法（例如起溫室種植），增加生存機會。

經過數百年，毒雲層下嘅動植物已經進化為新嘅物種，捕獵佢哋就可以提取病原體，藉此研發出治療疾病嘅藥物。病原體仲可以改造為武器，又或者刻意令自己感染提高身體能力，配合各種自製武器將可前往更深層區域。

另外有關開發商 Far From Home，其實佢哋係一班非常資深嘅遊戲人，成員曾經製作嘅項目有《Dying Light》、《神諭：原罪》、《The Medium》、《Outriders》、《League of Legends》等等，絕對經驗老到。

《Forever Skyies》預計於 2022 年內推出，對應平台為 Xbox Series X|S、PS5 及 PC Steam。