今次為大家介紹嘅作品係一款充滿濃厚日本味嘅 Rouguelite 動作遊戲《侍神大亂戰》，遊戲畫風可愛，加上有少少洛克人、無雙等元素，理論上玩落唔會差得去邊，會出埋落 PS4 同 Nintendo Switch，大人細路都啱玩。

《侍神大亂戰》（Samurai Bringer）由 ALPHAWING 開發，係一款 Roguelite 動作角色扮演遊戲，採用俯視視角。玩家將扮演擁有強大神力嘅神祇「須佐之南」，因為討伐八岐大蛇失敗而被奪走力量並流落他鄉。為咗重拾力量，必需與來自其他時空嘅知名日本武將戰鬥，得到佢哋嘅力量後再次挑戰八岐大蛇。

喺遊戲過程中玩家擊敗敵人後可得到「戰鬥卷軸」，用以解鎖橫掃、突刺等新嘅戰鬥動作，又習得增加跳躍力、推等動作，有趣嘅係學識一般動作後可以加埋戰鬥技能演變成雷電迴旋斬等新招式，透過各種技能配搭創出自己嘅戰鬥風格。

遊戲另一賣點係會出現織田信長、伊達政宗、真田幸村等過百位日本傳奇武將，擊敗佢哋之後可以得到相應嘅武器同盔甲，呢類武器同盔甲附加咗各種提升狀態效果，又因為係 Roguelite，意味住關卡係隨機生成，每次敵人位置類型都唔同，所以得到嘅裝備技能又每次都唔同，係幾過癮。

《侍神大亂戰》（Samurai Bringer）預計於今年春季發售，對應平台為 PS4、Nintendo Switch 及 PC Steam。