對航海冒險有興趣嘅朋友要留意啦，預計三月推出嘅新作《FAR: Changing Tides》（遠方：湧變暗潮）將以航海為主題，不但會喺海面航行，更會潛入深海探索未知嘅領域，喺美麗嘅新世界中探索失落遺跡，大家準備好出航未？

《FAR: Changing Tides》由瑞士開發團隊 Okomotive 開發，係一款動作冒險解謎遊戲。背景以上集《FAR: Lone Sails》為基礎，進一步擴張荒涼孤寂嘅感覺，上集受烈日曝曬塵土飛揚嘅乾涸海床喺今集變為狂風暴雨嘅洶湧大海。玩家將扮演小男孩 Toe，某天醒來之後發現得返自己一個，而且整個世界被水所覆蓋，於是佢就駕駛船隻，喺兇險嘅海上航行、潛入深海探索冒險，尋找新嘅家園。

駕駛船隻時玩家唔係淨係掌舵咁簡單，揚起降帆、豎起船桅、蒸氣機加熱等等工序全部係你一個人搞晒，更會出現船隻損壞、缺乏燃料等情況。所以發現可登陸、海底洞穴、遺跡等地方都要出去探索，尋找零件燃料等資源。根據開發團隊所講，遊戲中會有大量需要克服嘅危機及謎題，喺獨自一人遊玩嘅旅途將令人深思。

《FAR: Changing Tides》預計於 3 月 2 日推出，對應平台為 Xbox Series X|S、Xbox One、PS5、PS4 及 PC Steam & Epic Games Store，支援繁體中文。