開鎖呢種解謎小遊戲經常出現於各類遊戲中，相信大家都唔會陌生。今次介紹嘅「遊戲」《Museum of Mechanics: Lockpicking》就係一款集合大量開鎖小遊戲嘅作品，更有部份係出自經典名作《Mass Effect》、《上古卷軸》等等，與其話佢係遊戲，其實更接近於係可互動嘅「博物館」。

《Museum of Mechanics: Lockpicking》由 Dim Bulb Games 開發，係一款模擬解謎遊戲，採用第一身視點。遊戲主要係集合各類作品中出現過嘅開鎖謎題，有無玩過都可以品味嘗試，另外喺每個展區都會有個大佬級嘅鎖「The Door」，佢會不斷變化供玩家重覆挑戰。

基本上本作似係展覽、集合各中類似作品嘅數位博物館，而且現時可以玩嘅數量唔算太多，為人所咎病。收集同類遊戲呢個概念非常唔錯，作為博物館 / 檔案館收集同類小遊戲可以應用喺更多地方，不過需要喺細節上更加完善，例如係重現舊關卡同時增加其他變化版本，提高難度以及額外玩法咁先令遊戲更符合現代標準。

《Museum of Mechanics: Lockpicking》已經推出，對應平台為 PC Steam 及 itch.io，後者可免費下載。