《薩爾達傳說：曠野之息》係近年最出色最具代表性嘅遊戲應該無人有異議，佢有幾完美應該唔需要多講，但係唔少人心目中都係欠缺一樣野，就係「多人遊玩模式」。於是舊年十一月就有位 YouTuber PointCrow 出資，希望有人能夠製作多人連線模式，最正嘅係真係有人做緊出黎，仲有初期開發影片睇，好似樣！

YouTuber PointCrow 喺舊年十一月果陣出咗一條 Twitter，內容係只要任何人製作《薩爾達傳說：曠野之息》多人模式 Mod，就可以得到 10,000 美元，但前提係呢個 Mod 最少可支援兩位玩家遊玩，必需完全免費，並且需於《薩爾達傳說：曠野之息》續集推出前兩個月搞掂。賞金雖然並唔係話好多，但熱愛呢款遊戲嘅玩家群非常龐大，多人模式又可以話係共同願望，有賞金鼓勵自然強化大家製作 Mod 嘅動力。

//twitter.com/PointCrow/status/1458283375513333760

為咗完成呢個 Mod，模組製作者 Alex Mangue 聯同 Sweet、Ethi 攜手開發多人模式，並且不時更新開發狀況，最近更上載展示影片。現階段見到其他角色同樣可以跑跳爬牆打怪，不過就估計會有限制連線範圍，因為有唔少遊戲喺連線模式下，超出一定範圍會自動傳送返主機附近，以此控制運算資源（例如《Anthem》、《Outrider》）。另外，雖然畫面表示其他玩家使用不同角色，但實際都係用緊自己隻林克，只係用咗外觀模組。

現時呢個多人模式 Mod 仲係處於早期開發階段，仲有大量問題需要解決，例如角色動作同步、怪物血量同步等等，需要時間慢慢解決。不過開發多人 Mod 要面臨嘅問題都係強大嘅任天堂法務部，開發團隊成員就話 Mod 係完全免費唔打算賺錢，加上係 Fans 製作並無任何版權，相信任天堂唔會對佢地採取行動，作為玩家當然亦都希望任記隻眼開隻眼閉。

//twitter.com/EthiPresident/status/1480748428913164288?

《薩爾達傳說：曠野之息》未有實際推出時間，有興趣嘅朋友可以 Follow 返製作團隊 Twitter。