日前出現咗一款話題作品《昭和米國物語》，以昭和年代日本時代為背景，用強大嘅經濟能力「殖民」美國嘅空想世界。由於內容充滿惡搞元素，亦都因為有極濃厚嘅 B 級片味道而引起美日玩家注意。

《昭和米國物語》由中國武漢獨立團隊 NEKCOM GAMES 開發，係一款日系動作角色扮演遊戲，採用第三身視點。遊戲設定於昭和六十六年，日本憑藉強大經濟實力，買咗大半個美國。大量嘅日本人移民並將文化帶入美國，整個美國到處充斥住日式廣告板、金門大橋亦都掛上巨大嘅燈籠、加州荷李活地標變成「新橫濱」（NEO YOKOHAMA），整個美國就處於呢種文化交融嘅狀態，而日本亦都真係曾經有錢到不可思議嘅地步，相信遊戲設定亦都由此啟發。

故事嘅主角千草蝶子同妹妹因為黎到「新橫濱」試鏡，但係一到埗就被人暗殺，然後埋屍於荒野。喺呢個時候，一場原因不明嘅災難降臨，毀滅整個人類社會，只係得返喪屍同怪獸橫行於地面，倖存嘅人類就得返黑道同賊，為咗搶奪有限嘅資源而互相爭鬥。千草蝶子就係呢個亂到爆嘅世代死而復生，一邊尋找妹妹一邊發掘事情始末，踏上旅途。

玩法就類似一般亂劈類動作遊戲（老實講有幾分 Nier 味），有近戰斬擊有遠距離槍戰，而且有「鑽頭」呢類惡搞武器，當然仲有得出技、角色成長要素、收集元素，睇片打擊感亦都不俗，係跳出黎啲數字有啲「柒」。另外仲會有大量支線任務、小遊戲，亦有唔少「梗」出現（例如全世界最多人識嘅泳池），預告片亦都用上八十年代紅極一時嘅歌曲「それが大事」，一反抄 Game 大國嘅一貫風格。

地標：全世界最多人識嘅泳池

《昭和米國物語》暫時未有推出時間，對應平台為 PS5、PS4 及 PC Steam，支援繁體中文。