一直以來 Bio 玩家群都好想重製兩款舊作，一隻係《BIOHAZARD 2》（所以之前官方正式公佈果陣大家都好興奮），另一隻就係《BIOHAZARD CODE:Veronica》（生化危機：聖女密碼），可惜後者等待多年一直未有重製消息，於是一班玩家決定自己出手，以現今嘅技術令重製，並預定於今年內免費推出。

《BIOHAZARD CODE:Veronica》喺 2000 年推出，係由 Capcom 同 SEGA 共同開發嘅首款生化危機外傳遊戲。當初係由 SEGA 子公司「Nex Entertainment」全權開發，SEGA 負責支援開發人員，而 Capcom 則負責監督及協力。故事劇情係接續二代之後，女主角 Claire 喺搵哥哥 Chris 嘅時候失手被擒，被送去 Rockford Island 時所發生嘅故事。

玩家重製版除咗畫面貼近返現代水平之外，玩法、UI 亦都改為近似《BioHazard RE2》，並採用第三身視角，亦都加入類似《BioHazard RE3》緊急迴避動作，不過似乎可以主動使用。另外《BioHazard RE2》消耗一把刀仔插喪屍掙脫玩法亦都有放埋落去，可以話係集重製版之大乘，不過影片所見手槍打擊感認真麻麻。

如果大家有印象，之前《BIOHAZARD 2》亦有玩家出手重製，但係被 Capcom 阻止，因為佢地正打算公佈《BioHazard RE2》計劃。今次嘅《BIOHAZARD CODE:Veronica》重製版同樣有版權問題，而製作團隊之前直頭有喺 Twitter Tag 過 Capcom，但係後者並無採取任何行動，相信係未有重製計劃。為免重製版計劃告吹，製作團隊亦都表面所有版權都屬於 Capcom，只要官方出聲就會取消計劃，亦都因為咁所以遊戲會用免費型式推出。

《BIOHAZARD CODE:Veronica》玩家重製版預計於 2022 年推出，對應平台為 PC。遊戲將會分為三個章節供玩家免費下載，每節遊玩時間約四小時時長約4小時，支援中文，另外製作團隊亦都表示正在開發初代 Biohazard，預計 2022 年推出，相關消息請留意返官方網站。