VR 遊戲雖然推咗好幾年，但係遊戲類型黎黎去去都係射擊、解謎、戀愛育成居多。今次介紹嘅遊戲《Dragon Fist: VR Kung Fu》，就係非常少見嘅真 • VR 格鬥遊戲，玩家親身落場同人較量，仲有大家非常熟悉嘅太極、詠春等流派，係時候將閃電五連鞭發揚光大了。

《Dragon Fist: VR Kung Fu》由獨立團隊 Ben Olding Games 開發，係一款 VR 專用格鬥遊戲，採用第一身視點。根據官方介紹，本作嘅靈感來自近幾十年中香港武術電影中出現嘅人物，有少林和尚、西洋拳王、忍者、甚至有啟發自李小龍嘅角色，總人數多達四十位，每位都有自己嘅戰鬥風格，非常豐富。

遊戲畫面非常「陽春」（人物模組直頭係……），但係玩法就力求接近現實。對戰感覺類似第一身視點嘅《Virtual Fighter》，例如用手臂擋格、用手撥開敵人攻勢、推開敵人等，亦可以四處靈活走動尋找破綻入人中路，而且以上種種戰術你嘅敵人亦都同樣識用，真係好似同人過手咁，基本上主力就係玩見招拆招。另外雖然大部份角色都係赤手空拳對戰，但係面對部份敵人會「打茅波，納架生」，打打下隨時拎個血滴子出黎，果然「拳法」是無敵的……。

《Dragon Fist: VR Kung Fu》已於 12 月 16 日推出，對應平台為 PC Steam，必需使用 VR 裝置。