雖然話啱啱踏入新一年，但係有睇開我哋嘅讀者相信都係儲落一大堆 Game 未玩，既然係咁唔差在買多隻儲咗先。預計喺今個月推出嘅機甲動作遊戲《Blackwind》，畫面打擊感速度感都做得唔錯，夠難度同時係比較少見會隨場景轉變嘅俯視角度，質素唔錯買得過！

《Blackwind》由 Drakkar Dev 開發，係一款機甲動作遊戲，採用俯視角度。遊戲舞台設定於一個叫做「Medusa-42」嘅礦山殖民星球，人類已經喺呢度興建多個採礦基地，但因為拉諾斯外星人入侵而令整個星球捲入戰火。玩家所扮演嘅主角 James 係一個無受過正規軍事訓練嘅少年，因為一個意外著上由父親所開發嘅軍用原型戰術裝甲「Battle Frame」，身處戰場嘅主角必須盡快學識點用呢套裝甲，同時尋找失蹤嘅父親，努力奮戰。

玩家將操作機甲，以豐富嘅武器進行戰鬥，除咗有光束刀刃呢類近戰武器，仲有光槍、飛彈、榴彈砲等遠距離武器炮轟敵人，亦可透過技能樹強化武器及學習招式。不得不提嘅係本作加入二段跳、抓住物件攀爬、可騎上巨大敵人身上攻擊等行動，喺俯瞰視角遊戲相當少見，另外更會因應場景變動而改變視角，增加畫面逼力。

另一樣有趣嘅地方在於本作有操作無人機呢個玩法，玩家可放出無人機先行探索並進行掃盪，減低自己受傷嘅風險。另外本作支援區域連線雙人協力，將由 1P 操作主角機，2P 操作無人機（雙人模式下無人機攻擊力及手段似乎勁過單人模式）。

《Blackwind》預計於 1 月 20 日正式發售，對應平台為 Xbox Series X|S、Xbox One、PS5、PS4、Nintendo Switch、PC Steam、GOG 及 Mac App Store，對應繁體中文。