【遊戲新聞】日本國民遊戲總選史上百名最愛遊戲任記成大贏家

每個國家玩家口味都唔同，大眾印象係歐美鍾意射擊類遊戲、亞洲玩家偏向角色扮演類、強國玩家熱愛課金類，但作為遊戲大國嘅日本，佢哋玩家嘅喜好又係咩呢？日本朝日電視台喺 12 月 27 日播出嘅電視節目「電玩遊戲總選舉」（テレビゲーム総選挙），就公布咗超過 5 萬名日本國民票選史上最愛一百名嘅電玩遊戲排名，最後由《薩爾達傳說曠野之息》獲得了第一名，實至名歸。

今次選舉日本全國有超過 5 萬名國民參與，票選五款歷來所有家用機、手提機上推出嘅最喜愛嘅遊戲，年代不限。根據喜愛嘅順序，第一位會得到十分、二位七分、三位五分、四位三分、五位一分點數，最後以分數為依據作排名。最後由 2017 年 Nintendo Switch 護航作品《薩爾達傳說曠野之息》奪得，順便回帶推出當年本作橫掃 TGA 遊戲大獎、金搖桿獎、D.I.C.E. 大獎等等獎項，截至現時全球累績銷售數字更超過 2413 萬套，絕對係實至名歸。

奪得呢個殊榮，創造《超級瑪利奧兄弟》系列、《薩爾達傳說》系列、《銀河戰士》系列，現時代理任天堂高層事務嘅宮本茂亦都喺官方 Twitter 發表得獎感受，除咗多謝投票比任天堂一眾遊戲嘅玩家外，更令佢回顧返近 40 年來開發遊戲嘅點滴，亦會繼續創造為每個人帶來新體驗嘅電子遊戲。

宮本です。昨夜に放映されました「テレビゲーム総選挙」では数多くの任天堂タイトルにご投票いただき、ありがとうございました。40年近く繰り返してきたゲーム開発のそれぞれのシーンを思い返す機会にもなりました。これからも皆さまに新しい体験を届けられるビデオゲームを作り続けます。

— 任天堂株式会社 (@Nintendo) December 28, 2021

得到第一名固然威水，淨低嘅排名都好有趣。喺十大遊戲中，1992 年推出嘅《勇者鬥惡龍 V 天空的新娘》奪得第二名；第三名係 1997 年推出嘅《Final Fantasy VII》，再次力證國民 RPG 嘅實力。然後第四、第五名分別係《集合啦！動物森友會》以及《Splatoon 2》奪得；第六係《勇者鬥惡龍 III 接著邁向傳說》；第七係《任天堂明星大亂鬥特別版》；第八係有「平成年最強遊戲」之名嘅《Chrono Trigger》；第九意外地係《Final Fantasy X》；第十係《超級瑪利奧兄弟 3》。基本上頭十名都係由任天堂同 Square Enix 兩間公司瓜分，有趣嘅除咗《Final Fantasy X》之外，全部作品都曾於任天堂主機推出，話任天堂係最大贏家絕不為過！

第 1 名：《薩爾達傳說曠野之息》（任天堂）
第 2 名：《勇者鬥惡龍 V 天空的新娘》（ENIX）
第 3 名：《Final Fantasy VII》（SQUARE）
第 4 名：《集合啦！動物森友會》（任天堂）
第 5 名：《Splatoon 2》（任天堂）
第 6 名：《勇者鬥惡龍 III 接著邁向傳說》（ENIX）
第 7 名：《任天堂明星大亂鬥特別版》（任天堂）
第 8 名：《Chrono Trigger》（SQUARE）
第 9 名：《Final Fantasy X》（SQUARE）
第 10 名：《超級瑪利奧兄弟 3》（任天堂）

令人意外嘅係第十一至一百名遊戲入面，極少如《Doom》、《Rainbow Six》等經典外國大作，就算係近年大受歡迎嘅《巫師 3》、《It Take Two》、《Hades》亦都無份，吹捧到上天嘅《原神》就更加影都無，改變遊戲業界嘅超級經典《Street Fighter II》，亞洲地區超皇牌《魔物獵人》亦都係排於較後位置，令人意外。