非常經典嘅《幻想三國誌》系列，原來第一集已經係 2003 年推出，更估唔到嘅係原來仲有推出新作計劃。日前宇峻奧汀宣佈推出系列最新作品《幻想三國誌-天元異事錄》，並且開啟 Steam 商店頁面，預計明年一月推出試玩版。

《幻想三國誌-天元異事錄》故事設定於中平五年，黃巾之亂已過，但亂世依舊，風波不止。因為喺戰亂中遺失重要嘅典籍，所以尚書盧植委派藏花樓密探伏策同埋由主角扮演嘅幫手譙方，前往廣闊嘅神州大地尋找失物，路上冒險旅途當然會遇到各路特色人物，順勢揭開隱藏於歷史背後嘅神話真相。

遊戲採用回合制，係一款單人角色扮演遊戲。已知會設有屬性相剋、五行等弱點機制，可針對屬性進行弱點攻擊。另外喺遊戲截圖所見，二代女主角海棠亦會登場，估計會有更多初代角色出現，等待官方進一步消息發表。

《幻想三國誌-天元異事錄》暫未有實際推出日期，不過明年 1 月 20 日會有試玩版上線，另外《幻想三國誌》系列歷代作品亦會喺明年 1 月推出 Steam 版本，有興趣嘅朋友留意啦。