今年推出嘅射擊遊戲大作基本上隻隻都「有啲野」，好在早排推出嘅《Halo Infinite》扳回一城，雖未叫做完美但起碼係合格線以上。勢估唔到，臨近年尾突然有隻黑馬殺出，就係今次介紹嘅射擊遊戲《Ready or Not》，多人擬真攻堅玩法比起《Rainbow Six Siege》初推出時更優秀，難怪推出短短一星期就得到超過六千條評論，並得到「壓倒性好評」評價。
《Ready or Not》由 VOID Interactive 開發，係一款戰術射擊遊戲，採用第一身視點，最大支援五人線上合作。遊戲賣點在於製作團隊事前向各國警方請求合作，製作出兼具挑戰性與真實性嘅交戰準則及計分系統，同時仲設計埋彈道穿透、反彈、防彈背心纖維與鋼板動態系統，亦有模擬彈藥實際膨脹情形與推動力，簡單講就係本作係以極接近真實環境為前題製作。
玩家以五人一組展開行動，不過同一般射擊遊戲唔同，喺正式攻堅前要先睇樓層平面圖、任務簡報、偵查等資訊制定戰略，同隊友溝通後再分配戰力，大約係邊個負責顧左邊個顧右咁，再決定埋邊位隊員用防彈盾、攻城錘、戰術梯等裝備，甚至可招募狙擊小隊、談判專家等特殊人員幫手。
事前部署極真，埋牙攻堅部分像真度亦都遠勝其他同類遊戲，特別係細節上嘅處理令人驚艷。例如係開門呢個動作，一般射擊遊戲都係得開同唔開兩個選項，不過喺《Ready or Not》入面，就算係開門都可以揀只開一條小縫、一般開門、用腳大力踹開，當中開小縫呢個動作又別具意義，因為可以先用鏡偷睇門內敵方人數配置等相關情報，有時甚至會見到綁住門嘅手榴彈，一打開就爆，要事先用工具剪處理先無事。
除咗上述戰術玩法，當然仲有其他細節，例如放煙彈時要配戴防毒面具、使用夜視鏡有特定雷射配件等等，事前亦要同隊友互相配合，例如夜視鏡唔會配電筒、想靜靜地潛入就避免用霰彈槍破門等等，然後仲有鏡槍、盾、攻城錘等戰術道具，齋配裝都有排玩。
遊戲現時有六張地圖可玩，當中又分為不同模式，玩拆彈嘅「Bomb Threat」、玩救人質嘅「Hostage Rescue」等，每個模式對裝備都有不同需求，喺玩之前隊友們要認真溝通。另外由於本作係玩緊擬真攻堅唔係恐怖分子，所以就算見到有武裝嘅敵人都唔係直接開槍擊殺，而係要比一個投降嘅機會佢哋，如果對方棄械跪低，我方仍開槍擊殺的話，任務結束後就會扣分，所以見到人垂低雙手就唔好話人想施襲，然後開槍打佢，會扣分架！
《Ready or Not》已於 12 月 18 日推出，對應平台為 PC Steam。
不撤不退，我愛香港。