作為打工仔，相信大部份人都好怕凡事親力親為樣樣都要理嘅老闆，能力好嘅自然幫到手，不過大多數嘅老闆都係「自以為」有能力，實際上都係阻住你做野多。今次介紹嘅遊戲《打工人》就係覺得公司啲太廢，決定拎起鍵盤打爆佢哋，由自己話事！

《打工人》（The Company Man）由馬來西亞獨立工作室 Forust 開發，係一款橫向動作遊戲。玩家將扮演普通打工仔吉姆，因為對公司種種不滿，於是拎起鍵盤上路，由人事部一路殺過去市場部、會計部等等，打倒其他瘋狂同事以及老闆（真係 Boss），誓要成為公司總裁由自己話事。

遊戲中總共有七個部門（即係七關），每個部門都有符合該地特色嘅陷阱、古怪同事（小卒敵人）以及部門主管（Boss）。例如冷氣凍到地下結冰嘅會計部、無盡文書工作文件堆積如山嘅人事部等等，場景設計幾有心思。另外，戰鬥方式除咗揮動鍵盤近戰攻擊、亦可以「射」出電郵遠程攻擊同事，每擊敗一個部門仲可以升級鍵盤提高技能，而喺關卡中途會有咖啡機出現，飲完就會恢復精力，當然仲有洗錢強化角色體力等元素。

除咗正常挑戰關卡，仲隱藏秘密地牢供挑戰，可以視之為持久挑戰模式。另外，根據官方介紹，遊戲中會出現大量諷刺垃圾上司、煩膠同事嘅雙關語及笑話，令到遊戲變得更輕鬆惹笑。

《打工人》（The Company Man）預計於 2022 年初推出，對應平台為 Nintendo Switch，支援繁體中文。