由 2013 年搶先體驗到而家都仲體驗緊嘅喪屍生存遊戲《Project Zomboid》，日前公佈即將推出超大型更新「Build 41」，改版後將大幅改變遊戲玩法，並追加多人連線遊玩呢個咁重要嘅元素。一隻推出八年嘅遊戲，持續得到「極度好評」評價一定有佢嘅魅力，玩過棄坑又或者未接觸過嘅朋友，趁住改版係時候試下啦！

《Project Zomboid》由  The Indie Stone 開發，係一款末日喪屍生存恐怖遊戲，採用開放世界。遊戲講述喪屍潮爆發，世界被佢地所控制，一班倖存者想辦法利用狡猾、運氣、能力去努力求存，而且唔會有任何人幫助，所有野都係靠自己，係一隻高難度生存遊戲。

由於係一隻生存遊戲（仲要高難度），角色有飢餓度、會病，仲會產生抑鬱、無聊等精神狀態，有日夜交替、實時照明、聲音、能見度、體溫系統等機制。所以除咗最基本可以透過耕種、捕魚產生食物，砍樹、去城市搜刮資源建造防禦工事、堡壘等等，玩法極自由，但同時會面對能源短缺，晚上要保持安靜、熄燈瞓等真實設定。

今次大型改版「Build 41」，大幅改良人物外觀細節、戰鬥相關動作，並增加潛行、奔跑、攀爬、跳欄等動作；新地圖系統允許玩家繪製自己嘅探索圖，新傷害系統、衣物保護實裝等等，喪屍們不論外觀動作行為都有大幅強化，新城市新裝備果啲不在話下，最重要嘅就係加入多人連線模式，現時正測試中。另外，仲加入「啟示錄」、「生存者」「建造者」等其他遊戲模式，即使係不同類型嘅玩家都會搵到樂趣，簡單講就係成隻遊戲所有地方都有大幅改變，官方亦講明可視之為續作（但係隻 Game 仲做緊搶先體驗）。

《Project Zomboid》大型改版「Build 41」已經實裝，對應平台為 PC Steam 及 GOG 不過鍾意玩返原版都無問題，因為官方已經將遊戲拆開，玩家可自由選擇遊玩新舊版本。