人氣作品《Overlord》早前公佈一款改篇自動畫小劇場《克萊門汀逃亡篇》（ぷれぷれぷれあです クレマンティーヌ逃亡編）嘅遊戲《Overlord 納薩力克大逃亡》（OVERLORD -ESCAPE FROM NAZARICK-），玩家將扮演被復活後嘅人氣角色克萊門汀，逃出納薩力克地下大墳墓。

《Overlord 納薩力克大逃亡》由 ENGINES Inc. 開發，係一款平面橫向捲軸動作遊戲。故事講述克萊門汀被殺後，無上至尊安茲·烏爾·恭將佢復活並逼佢參與逃出納薩力克地下大墳墓實驗。根據小劇場本身嘅解說，復活後會有失憶、唔會深思熟慮等徵狀。跟返呢個設定，克萊門汀醒來嘅時候失去大部分記憶，並且無武器兼唔記得點用戰技，之後透過探索地下大墓地搵返散落於各處嘅記憶碎片，並搵方法逃出此地。

喺探索過程中會搵到各種武器以及重拾克萊門汀超強化、不落要塞等各種能力，介紹影片入面仲可以利用鏈錘釘住天花快速移動，亦有使用冰魔法凍結敵人，再以之作為踏腳石向高處移動等手段，當然仲有強化武器等元素。敵人方面，影片中有娜貝拉爾·伽瑪出現，預計「昴宿星團」其他角色都會登場，亦會有原作者 丸山くがね 先生監修嘅原創新劇情。

《Overlord 納薩力克大逃亡》預計於 2022 年發售，對應平台為 PC Steam。