今年遊戲界最大贏家一定係必需雙打嘅遊戲《It Take Two》（雙人成行），佢嘅成功令到大家重拾雙人合作果種同步突破難關嘅快感。由台灣團隊製作嘅雙人解謎遊戲《Aliisha – 雙子神遺棄之境》，以充滿特色嘅雙人合作遊法做賣點，喺募資平台嘖嘖以高達八倍目標金額完成，得到一眾玩家肯定，早排仲上埋任天堂嘅獨立遊戲發表會，令人期待！

《Aliisha》由台灣團隊 Underscore 開發，係一款雙人益智解謎探險遊戲。玩家將扮演雙胞胎姊妹 Lisha 與 Aisha，兩人各自有異於常人缺陷，姐姐 Lisha 無法感受、認知情感，思考理性；妹妹 Aisha 則相反，感情豐沛，但身體沒有痛覺，因此經常搞到自己傷晒。一個偶然下，佢哋發現荒廢古代神殿「忒恩格卡」有一件神器可將兩個靈魂合而為一，化解兩人嘅缺陷，然後佢哋就決定前往神殿遺跡探險。

本作最大特色在於遊玩方法，兩位玩家需要用線下模式連線遊玩，操作妹妹 Aisha 嘅玩家要用 TV 模式，用 Joy-Con 以體感方式操作；操作姐姐 Lisha 嘅玩家則要用掌機模式以觸控方式解謎，當中不乏要同時進行嘅玩法，而且兩位玩家要交換喺遊戲過程中得到嘅資訊，溝通後再討論解謎方式。另外，想單人遊玩其實都可以的，本作有單人模式，玩法變為不時切換兩位主角進行遊玩，老實講趣味性一定比起雙打少，純係照顧埋孤狼玩家咁解。

不得不提嘅係本作音樂部份非常出色，由於製作人之一嘅 Nate 本身就係開音樂，所以整體音樂音效都有強化世界觀效果。喺嘖嘖募資頁面仲有放出主題曲嘅中、英、日文版慨念 MV，質素的確唔錯。

《Aliisha – 雙子神遺棄之境》預計於 2022 年春季發售，對應平台為 Nintendo Switch。