著名科幻小說《沙丘》（Dune）今年推出嘅電影大獲好評，令年輕一代重新認識呢套作品。日前喺「The Game Awards」遊戲大獎上公開改編作品《Dune: Spice Wars》（暫譯：沙丘：香料戰爭）宣傳影片，同時開啟 Steam 商店頁面。

《Dune: Spice Wars》由 Shiro Games 開發，官方定為做即時戰略遊戲。根據官方資料，本作具備探索（Exlpore）、擴張（Expand）、開發（Exploit）、殲滅（Exterminate）四種元素，即係一般玩家所講嘅「4X」，所以感覺上更接近於回合制策略遊戲多啲。（其實 Dune 喺 1992 年曾經出過一款遊戲，評價唔錯仲被喻為外國版三國志）

喺《沙丘》世界中，香料係宇宙中最貴重嘅資源，可以延年益壽、擴展意識，更可以進行星際旅行。玩家會喺幾個派系中選擇其一進行遊戲，現時已知包括 House Atreides 及 House Harkonnen，帶領佢哋透過拓展領域、建造、採集香料等手段壯大勢力。當中亦可以透過運用計謀，間碟、政治操作或者發動戰爭削弱敵方勢力。

喺進行上面種種操作期間，唔好忘記掃描地圖尋找巨大沙蟲嘅蹤跡，如果唔係佢地會將你嘅香料採集部隊同埋香料採收機吞噬破壞，嚴重影響戰略部儲，隨時一舖輸返轉頭。

《Dune: Spice Wars》（暫譯：沙丘：香料戰爭）預計 2022 年推出，對應平台為 PC Steam，另外發行商 Funcom 亦會聯同德國遊戲工作室 Nukklear 共同開發《Dune》開放世界生存遊戲。