就到聖誕，約埋一班朋友上屋企玩係好正常嘅事，呢啲情況通常都要準備定幾隻可以一齊玩嘅 Party Game，開心嘛。今次介紹嘅《Rubber Bandits》出咗無耐，美術風格抵死，玩法操作簡單直接，絕對係宴客佳品！

《Rubber Bandits》由 Flashbulb 開發，係一款多人對戰派對遊戲，最大支援四人線上或線下同遊。遊戲玩法好簡單，各玩家開始時係扮演一班劫匪，喺場地中一邊亂鬥一邊搵機會打開金庫搶錢，再盡力拎最多嘅錢然後逃離。一但成功逃脫，該玩家會喺一段時間內以警察身份回歸，當場上所有人走晒、拉晒或者無錢搶該回合就會結束，最後以得到最多錢嘅玩家勝利。

遊戲玩法簡單直接，戰鬥過程亦都好易上手，特別係有玩過昔日名作《Power Stone》嘅就更易上手，因為戰鬥部份都幾多相似嘅地方。首先係場地上接近所有物件都可以拎上手當武器用，麵包又好、電筒又好，拎上手就可以扑人或者掉人，場上仲會有較強力嘅武器例如槍械、炸彈甚至光劍都有，先搶先贏。如果搶武器唔夠人黎都唔需要擔心，場上有固有機關，逃脫點又有手動操作嘅陷阱，有啲場景仲可以拆樓，齊齊攬炒！

《Rubber Bandits》已於 12 月 2 日推出，對應平台為 Xbox Series X|S、Xbox One 、PS5、PS4 及 PC Steam，並且已於首日列入 Xbox Game Pass，支援繁體中文。