喺回合制策略遊戲範疇，《文明帝國》系列（Civilization）可以話係頂端作品，質素夠高又夠肝，仲有大量知識學習，備受玩家喜愛。一款咁受款迎嘅作品自然會有挑戰者，除咗備受觸目嘅《Humankind》之外，今次介紹嘅《Old World》同樣觸目，而且呢款作品主力喺整個邏輯細節上強化，令到遊戲更加真實，係真正嘅新世代策略遊戲。

《Old World》由 Mohawk Games 開發，係一款回合制策略遊戲。不得不提嘅係創立 Mohawk Games 嘅人物叫做 Soren Johnson，佢曾經做過《文明帝國 III》聯合首席設計師、《文明帝國 IV》首席設計師等等，而佢做過嘅遊戲多數都得到好評，加上佢主要都係製作回合制策略遊戲，所以今次嘅作品都幾有《文明帝國》影子，但係就更集中喺上古及古典文明時代，亦都更深入地喺遊戲中不同地方加入大量細節。

上面提到嘅「細節」，其實係一直都存在於其他遊戲但係大家又覺得係理所當然嘅野。例如建築時需要用到木頭、鐵、石頭等材料製作，但係咁耐以黎大家嘅概念都係「有材料就起到」，忽略咗建築時要用到嘅「工業」；爭加人口並非加大「食物」數字，而係要透過良好嘅市政條件等等，基於呢類型邏輯上嘅細節強化，令到本作比起傳統回合制策略遊戲更加真實同具體。

除咗上述例子，喺《Old World》入面玩家並唔再係上帝視角控制所有事物，而係透過控制一個統治者家族管治，每一代嘅統治者會經歷生老病死，再由後代繼位。亦因為咁所以要計劃婚姻、生仔、培育等家族事務，同時仲會有王朝合法性、民眾支持度等數值，亦要平衡角貴族間嘅需求、力量，透過聯姻、分封、賞賜等方式維持關係並互相制衡，玩家要考慮眾多因素，再去決定管治方針。

遊戲中有七個文明，分別係巴比倫、波斯、亞述、埃及、希臘、羅馬同迦太基，當中包括大量與佢哋文明相關歷史以及神話傳說，數量多達三千個。《Old World》入面亦會出現各種有著名將領、哲人、工程師等等，玩家可以招慕為己用，而佢哋亦會隨時間推進而發展出新嘅個性、增加資歷，到最後會生病去世，過程中更有可能影響下一代。

《Old World》元素多到數唔晒，例如與別不同，每回合都唔同嘅指令池、隨機技術樹等等，係超級精神時光屋。本作之前由 Epic Game Store 獨佔，令到不少玩家卻步，幸好下年第二季將會喺 Steam 推出，仲支援繁體中文，極推薦比喜愛回合制策略嘅玩家。