魂系遊戲備受機迷喜愛，早排仲拎埋「Ultimate Game of All Time」（史上最佳遊戲）殊榮，證明魂系大有市場。另一邊廂，出到第八集嘅生化危機系列同樣擁有極多 Fans，如果將兩隻遊戲元素溝埋一齊的話，齋諗都覺得正。今次介紹嘅遊戲《Evil Tonight》就係將兩款遊戲元素溝埋再平面化嘅作品，玩落發現質素極高，但係並無相應嘅曝光及討論，導致無乜人知呢隻出色作品，頗為可惜。

《Evil Tonight》由獨立團隊 DYA Games 開發，係一款平面動作冒險生存恐怖遊戲。故事描述主角係一位現代驅魔人，憑住出色嘅驅魔能力，已經平息咗無數鬧鬼之地，絕對經驗豐富。但係今次嘅任務同之前有所不同，所有野都無跟原定計劃進行，到底有無辦法捱過今晚呢？

遊戲戰鬥難度絕對唔易，就算係普通難度一般玩家都會感覺棘手。武器雖然有十字弓、手槍、散彈槍、機關槍等遠距武器，但係全部都計彈數的，而且子彈數量唔多，極有初代生危機味道。要慳子彈的話可以選擇使用刀仔，但係呢款遊戲好似《Dark Souls》咁，不論揮刀定係迴避都要扣體力，耗盡體力的話會暈幾秒非常危險，要不時控制體力消耗量。

戰鬥有兩款大作味道，地圖設計亦滲透住同樣嘅味道。喺遊戲中有大量隱藏小路，玩家需要探索整個地圖尋找物品，路上有怪亦會有精彩嘅 Boss 戰（仲有寶箱怪添！）。探索過程有大量機關，但係遊戲入面係無地圖呢樣野的（同《Dark Souls》一樣），所以要自己記路記機關，當然唔少得暗角衝出黎陰你嘅小怪。戰鬥以外本作仲有極多謎題解，最正嘅係每次解謎答案都有機會唔同，但係解法就一樣的，所以睇攻略都無意思，就好似玩返初代生化溝毒藥謎題咁，好過癮！

《Evil Tonight》已經推出，對應平台為 Nintendo Switch 及 PC Steam。