喺媒體及玩家中得到極度好評，於極權主義國家中生活嘅遊戲系列《Beholder》，因為故事劇情優秀，描述嘅細節亦與現實歷史事件相乎，不但令遊戲贏盡口碑，更奪得多個獎項，之後推出嘅續集亦同樣得到極高評價。呢款咁出色嘅作品將會喺明年推出第三集，並於日前放出首條預告片。

《Beholder 3》由獨立工作室 Paintbucket Games 製作，係一款策略模擬遊戲。今集玩家扮演嘅角色叫做 Frank Schwarz，佢本來有一份安穩嘅工作，但被人陷害後不但失業，更面臨牢獄之災。為咗避免入獄，佢選擇同高級國安官員交易，成為政府間碟，以公寓業主身份監視各租客日常生活、搜查佢地單位睇下有無違禁物，並清除所有你上司睇唔順眼嘅人。日常仲要宣揚極權主義國家意識形態、操縱傳播內容、裝監控鏡頭等等，但你亦要通過做日常家務去支付賬單、修理公寓等等，令租戶開心放下警戒。

日常要監視租客，同時你要暗中監視以及計劃對付你嘅同事同上司，因為咁樣先可以爬返去原本甚至更高地位，以得到更好嘅生活。即使係極權政府內部亦存在不同派系，小心哋選擇立場，明爭暗鬥或者令佢地互相對抗，從中獲利。

當然，你做監視者又好，與同事上司角力也好，舉報定包庇嘅選擇在你，最後亦會以玩家嘅行為做依據而產生不同結局，你係要改變現狀為真理而戰；維持現狀努力成為壓搾嘅一方；甚至係犧牲別人換來你想要嘅野，全部都係由你決定。

《Beholder 3》預計於明年第一季推出，對應平台為 PC Steam。