今次介紹嘅作品極受部分玩家注意，因為佢嘅靈感來自電影大師希治閣《迷魂記》（唔係我地老友希治閣），講緊嘅係心理驚悚遊戲《Alfred Hitchcock – Vertigo》（亞弗列‧希治閣：迷魂記），遊戲入面嘅故事主題、敘事手法以及視覺效果等等都會有大師希治閣嘅影子，而且會係一個原創故事與電影劇情唔同，鍾意大師電影作品嘅要留意啦！

《Alfred Hitchcock – Vertigo》由西班牙工作室 Pendulo Studios 開發，係一款心理驚悚遊戲，使用第三身視點。遊戲靈感來自電影大師希治閣《迷魂記》，係一個有關痴迷、操縱及瘋狂嘅全新故事。遊戲中首位主角係一名作家「Ed Miller」，曾經歷一場汽車意外並幸運生還，主角嘅記憶係事故發生時妻子同女兒都係旁邊，但係汽車殘骸入面搵唔到有其他人嘅跡象。因為自己記憶同現實嘅落差，令佢受到心靈創傷以及患上嚴重眩暈症，並嘗試調查呢場悲劇嘅真相，不過有時真相比瘋狂更可怕。

根據資料，除咗 Ed Miller 仲會有多兩位主角登場，佢哋各自透過不同視角、多重時間線去推進劇情及解謎，從中分辨真實與虛假嘅記憶，並逐步解開事件嘅真相。

《Alfred Hitchcock – Vertigo》PC 版將於 2021 年 12 月 16 日正式上市，Xbox Series X|S、Xbox One、PS5、PS4 及 Nintendo Switch 版本則預計於 2022 年發售。