以越獄為主軸嘅遊戲本身就唔太多（對上一隻玩嘅係《A Way Out》），喺獄中使用各種手段，有多種逃獄路線嘅玩法就更少。今次為大家介紹嘅獨立遊戲《動物迷城》就有晒以上特點，製作團隊更表明因為玩法眾多，每個玩家都會有自己嘅逃獄戲碼，感覺幾唔錯。

《動物迷城》由獨立團隊 Metal Head Games 開發，係一款策略角色扮演遊戲。故事主要舞台設定於一座守備森嚴嘅監獄，玩家將扮演一位被陷害嘅記者，喺呢座監獄入面坐冤獄，並努力喺監獄中生存同時收集證據，與律師摯友裡應外合，以之拯救自己及整座城市。根據官方訊息，呢個只係其中一個故事，之後仲會推出更多可扮演角色，每個角色都會擁有自己嘅故事。

雖然呢隻係一款逃獄遊戲，但當中包含生存、探索、成長、逃脫等要素，玩家喺獄中可以乖乖地做個模範囚犯；亦可以專搞破壞惹事生非；可以做獨行俠亦可以周旋於各個勢力間，透過交流收集各種情報。另外要逃獄自然要了解每個場景，由洗衣房到醫務室，下水道到停車場等等，每寸土地都係逃獄計劃重要嘅一環，而且透過日常所學習到嘅技能，偷偷收集嘅裝備同工具都係前往自由之路必需之物。

《動物迷城》尚未有正式發售日期以及對應平台，不過已經喺 Steam 開設商店頁面，有興趣嘅玩家不妨先將之加入 Wishlist，對應繁體中文。