《Dungeon and Fighter》（DNF）早喺 2005 年上市，係一款仿街機橫向動作遊戲嘅 Online Game，因為遊戲質素極高，簡直瘋魔萬千機迷，之後仲出埋動畫版添。上年年尾果陣 Ark System Works 就突然公佈推出以《DNF》為藍本嘅格鬥遊戲《DNF Duel》，但之後成年都無乜聲氣，直到日前終於有新條宣傳片以及開咗官方 Twitter，睇住新片止咳先啦！

《DNF Duel》由 Neople 及 Ark System Works 聯合開發，係一款平面格鬥遊戲，使用 Unreal Engine。喺影片所見，登場角色有鬼劍士、神槍手、格鬥家、異端審判者等，全部都係出自原版《DNF》職業，不過就未知道會否有街霸、柔道家等進階職業。

影片內所展示嘅角色連技甚有原版味道還原道高，而且連技尾段使出嘅招式會有光發出，似乎係要扣氣嘅 EX 技，並且可取消一般必殺技硬值，可用作收尾追加傷害。另外由於《DNF》有動畫版關係，好大機會會沿用同樣由 Ark System Works 製作嘅《碧藍幻想 Versus》入面所出現嘅 RPG 模式，就算自問不精於格鬥遊戲仍然可體驗《DNF》嘅樂趣。

《DNF Duel》尚未有確實發售日期及對應平台等資訊，不過已開設官方 Twitter，對本作有興趣嘅玩家不妨 Follow 咗先。