今次為大家介紹嘅獨立遊戲《Lost Ruins》（失落遺蹟）之前係 Kickstarter 集資，最終集得目標金額五倍資金，備受機迷支持，而且喺 Steam 上架後更 Keep 住得到「極度好評」評價，足證質素之佳。遊戲美術有濃厚日系風格，但唔係得外觀「可愛」，有返咁上下難度，誠意推薦俾喜歡橫向動作嘅朋友。

《Lost Ruins》（失落遺蹟）由韓國獨立開發團隊 ALTARI GAMES 製作，係一款類銀河戰士惡魔城橫向動作遊戲，採用日系動畫像素風格。故事講述一位少女喺昏暗地下城中醒來，不過已經失去記憶，與此同時被兇殘恐怖嘅怪物包圍，命緣一線間被一位名做碧翠斯嘅魔法師救咗。之後為咗瞭解自己身份、點解會流落此地而踏上旅程，開始探索遺蹟並揭開當中秘密。

如同其他類惡魔城遊戲，有刀劍、斧頭、弓箭等各式各樣武器，除咗對敵人揮砍之外，仲可以瞄準敵人攻擊並將之反彈。另外，本作精彩嘅地方係使用魔杖、藥劑、魔法卷軸等各種法術殺敵，魔法不但對敵人有效，亦會對場景、背景有元素間相互作用。例如易液體接觸到燭光就會引起熊熊燃燒；冰魔法可以將水凍結，帶來致命低溫等等。利用環境因素，加上魔法相剋屬性，戰鬥就越多變化越好玩。

嫌上面玩法未夠多變化？唔緊要，遊戲中仲有「飾品」呢樣改變玩法嘅裝備。飾品有五花八門嘅效果，例如保護你免受火焰灼燒、解除中毒狀態等等，配合上面所講嘅元素相互作用，就有更多策略戰術好玩。另外，日系美少女遊戲梗係有得換衫，玩家會喺途中搵到女僕裝、死庫水等外觀，亦有使用 Boss 等其他遊戲模式，夠晒誠意。

《Lost Ruins》（失落遺蹟）PC Steam、GOG、itch.io 及 Humble Store 版本已於 5 月 14 日推出，PS4、Xbox One 及 Nintendo Switch 版本則預計於今年第四季推出（不過已延期至 2022 年內），另外喺 Kickstarter 募資頁面有免費試玩版下載，可以試咗先買。