喺上年年中進行搶先體驗，結合第一身射擊、角色扮演、Roguelite 元素嘅作品《槍火重生》（Gunfire Reborn）終於正式推出，順便公佈埋黎緊會出家用機版。雖然初期面臨網路連線、平衡度等問題，但製作團隊持續更新令大多數問題解決，並得到大部份玩家肯定獲得「極度好評」評價，而家仲做緊特價，都幾抵玩！

《槍火重生》（Gunfire Reborn）由 Duoyi Games 開發，505 Games 發行，分類為 Roguelite 迷宮探索射擊遊戲，採用第一身視點，最大支援四人線上合作遊玩。本作結結合第一身射擊、角色扮演、Roguelite 元素，幾位玩家操作擁有不同能力嘅英雄，每隻英雄又有多種玩法，加上隨機掉落嘅武器、隨機關卡，加上高難度以外難度唔太需要玩家嘅槍法準繩度、技術，主力玩配技，喺呢一方面更接近 Party Game 多過射擊遊戲。

類似其他成長型 Roguelite 遊戲，雖然每次都係隨機獲得技能天賦、武器道具，但係因為每隻英雄都有自己玩法，自然出現如兔子散彈飛花流、元素瞳貓、驚蟄虎等流派玩法，自由度極高。挑戰噩夢以上高難度時更需要幾位玩家根據每個人手上技能組，溝通後交換適合技能互補不足，不但爭加通關機會，更豐富遊戲體驗。

遊戲現時有步槍、衝鋒槍、手槍、狙擊槍、發射器等超過 40 種槍械，每把武器都有會有自動追蹤、爆炸屬性、超高射速、傷害輻射等特性，加上英雄天賦、秘卷附加技、覺醒等，每次遊玩都有新鮮感，特別係四人遊玩時因為變數更大更加好玩。

《槍火重生》（Gunfire Reborn）正式版已經推出，增加新關卡及新英雄「千歲」，對應平台為 PC Steam，主機版就預計於 2022 年推出。