萬眾期待嘅頂級大作《艾爾登法環》（Elden Ring）早排已經做完封閉網路測試，雖然唔係人人有份，不過大家都玩得好 Happy。喺今次測試版地圖版邊有設置「霧牆」限制玩家探索區域，不過根據外媒 Kotaku 報導，有玩家成功突破「霧牆」進入未開放地區，預早窺探牆外地區面貌。
玩家 ramses1033 喺「霧牆」前嘅夾縫以跳躍攻擊成功突破障礙，進入霧牆後面嘅地區雖然並未有相關互動選項，不過另一位玩家 AllisonByProxy 就遇上新怪物熊。熊有兩種 Size，一般 Size 嘅熊並不難應付（擊敗後有機會掉落道具「金色屎」），巨熊就會自動攻擊接近嘅玩家，攻擊頻率及攻擊力都非常高，而且打打下會突然縮入地底，似係未整好。
喺未開放區域入面，玩家 Sekiro Dubi 發現一隻極神秘頭目「Crucible Knight Floh」。出現嘅方式類似喺合法地區出現嘅頭目「Bloodhound Knight Darriwil」，都係進入結界後被傳送至異空間決戰。由於相關內容並未完成，所以當 Floh 生成後就會立即掉落地圖之下，影片入面直頭見唔到 Floh 嘅樣貌，幸好有其他玩家測試多次後 Cap 圖成功，不過就無得正式對戰睇佢嘅招式。
另外亦有玩家穿過霧牆後，發現自己身處嘅區域係早前官方實機遊玩影片入面出現嘅壺型 NPC 所在地。但當佢去到之前影片所示嘅地方，壺型 NPC 並未出現，未知係因為所處地方並未開放所以無出現，定係要達成一定條件後先會出現，都係要等正式版推出先知。
《Elden Ring》預計於 2022 年 2 月 25 日，對應平台為 Xbox Series X|S、Xbox One、PS5、PS4、PC。
回帶相關文章：
【遊戲評測】媒體優先試玩速評 《艾爾登法環》新操作系統大量新元素主打戰技
VJGamer總編，細細個已經蒲機舖，機齡甚深，熱愛電玩文化。