作為貓奴，基本上隻 Game 有貓就加分，如果係扮演貓貓做主角直頭就神作。新作《Little Kitty, Big City》日前釋出首條預告影片，影片所述玩家需扮演黑色小貓咪尋找回家嘅道路，一路上極蠢地搗亂，真係好鬼死得意。

《Little Kitty, Big City》由獨立遊戲團隊 Double Dagger Studio 開發，係一款休閒冒險遊戲。玩家將扮演一隻喺大城市中蕩失路嘅好奇小貓咪，努力尋找回家嘅道路。咁因為你係一隻好奇心旺盛嘅貓咪，所以行過見到紙箱自然會跳入去玩下、見到雀仔就撲下、行過又會撥野落地，為城市留下各種混亂（有啲似之前嘅《Untitled Goose Game》）。當然，搗亂之外亦會有各種互動，例如會喺路上認識到狗仔、鴨仔等新朋友，亦可以透過收集帽子改變自己造型。

《Little Kitty, Big City》尚未確定發售日，對應平台為 PC Steam，有興趣嘅朋友可以先將之放入 Wishlist。