龍珠呢套作品我諗都唔需要介紹，一直以來龍珠主要都係出動作、格鬥類、角色扮演類，同埋都係以悟空做主角，不過日前發表嘅新作《Dragon ball The Breakers》就搞搞新意思，由一班普通人加斯路、菲利、布歐三大奸角擔正，玩非對稱脫出，睇落幾過癮！

《Dragon ball The Breakers》由 Dimps 開發，BANDAI NAMCO Entertainment 發行，係一款一對七非對稱動作遊戲，採用第三身視點。遊戲中玩家將扮演被獵殺嘅「倖存者」，或者獵殺一方「侵略者」。扮演平民一方都係無戰鬥力嘅普通人（有莊子同八戒），目的就係限定時間內啟動時光機逃離呢個時空。雖然係無戰鬥能力嘅平民，但透過拾取散落於場上嘅物品就可使用技能（如擬態為其他物品）以及特殊能力「龍變」，呢個能力會賦予你短時間「Ｚ戰士」力量，令你短時間內有能力與敵人一戰拖延時間，幾時選擇使用道具係致勝關鍵。

至於扮演「侵略者」一方嘅玩家，目標自然係阻止平民離開並獵殺佢地。有趣嘅係前期能力並不強大，要滿足特定條件先可以進化（影片所見斯路進化條件為吸取平民，咁講其實唔需要 17，18 號……），至於菲利及布歐就暫時未知進化條件。

另外，本作世界觀會與《Dragon Ball Xenoverse 2》共享，據了解之後會有通過存檔數據進行互動，未來兩款亦會有所協調。

《Dragon ball The Breakers》預計於 2022 年推出，對應平台為 PS4、Xbox One、Nintendo Switch 及 PC STEAM。近期亦會有 PC Steam 版封測舉行，日期及時間等詳細信息將於稍後公佈。