《方舟：生存進化》、《The Forest》等生存遊戲喺市面上有大量，不過絕大部份都係於險惡環境下求存，同「休閒」兩個字完全拉唔上關係。新作《Among Trees》則反其道而行，玩嘅係遠離繁囂進入森林以休閒方式生存，幾有新鮮感。

《Among Trees》由 FJRD Interactive 製作，係一款沙盒生存遊戲，採用第一身視點，開放世界。遊戲中玩家手執指南針，遠離繁囂都市進入色彩繽紛嘅森林深處，建造屬於自己嘅小木屋，過著簡樸、自給自足嘅生活。

前期玩家只有簡陋嘅小木屋，透過收集資源、重複擴建慢慢增加更多房間，同時解鎖如食物烹飪、植物種植、工具製作、縫紉等功能。由於本作主打休閒生活，室內佈置佔非常重要一環，例如喺房間擺放燈飾、小盆栽、設置窗戶令陽光透入屋內，將空間變得更有生活氣息，呢點做得幾唔錯。

作為一款生存遊戲，需要有食物，可透過野外收集又或者興建溫室自己種。解鎖烹飪後更可以選擇烹調方式，後期更可以從事漁業、釀酒、取水系統等等。「Hea」到悶悶地，想有返少少刺激的話又可以向森林深處探險，有洞穴、湖泊、廢墟等地方供探索，不過林中亦會有猛獸棲息，隨天氣變化更要顧及戶外保暖，時刻要留意大自然中嘅危機。

《Among Trees》正式版已於 11 月 10 日推出，對應平台為 PC Steam 及 Epic Games Store。