坊間有好多款百人同場對戰遊戲，不過成百人圍毆一隻頭目，除咗 MMORPG 遊戲都真係幾少機會見到。新作《Laugsh！》透過收集世界各地玩家數據，重現投影於戰場上，實現百人圍毆壯觀畫面！

《Laugsh！》由 Tokitamago 獨立開發，係一款單人平面動作遊戲。遊戲最大嘅特式係會收集來自世界各地玩家 Replay 數據，再將之重現於遊戲畫面中，以此實現一百人同場並肩作戰，但又唔會因為連線問題出現 Lag 機情況，類似機制《龍族教義》（Dragon’s Dogma）亦有使用過。

遊戲中玩家扮演人類一方，與巨型昆蟲以及重型外星機械生命體戰鬥。關卡中有多條前進路線，可以用最直接最短嘅路線直衝 Boss，亦可以穿越複雜地下道路，探索獲取新能力及武器。玩家可根據路線選擇，以不同嘅能力及人數去探索及迎戰巨大頭目。

《Laugsh！》預計於 2023 年推出，對應平台為 PC Steam。