之前我哋介紹過，得到編輯部一致高評價嘅即時戰術遊戲（RTT）《Desperado III》（詳細評測文章）落咗 Xbox Game Pass 之後 Keep 住有唔錯嘅成績，如果你都鍾意呢類型遊戲就要留意啦，因為佢嘅製作團隊即將推出新作《暗影戰術：幕府之刃～愛子的抉擇》（Shadow Tactics：Blades of the Shogun – Aiko’s Choice），玩女忍者刺客小隊潛行暗殺，又到食腦嘅時候啦！

《暗影戰術：幕府之刃～愛子的抉擇》由 Mimimi Games 製作，屬於即時戰術遊戲。今次新作係 2016 年推出嘅作品《暗影戰術：幕府之刃》最新獨立資料片，就算無玩過前作都可以獨立遊玩。遊戲舞台為於江戶時代時代日本，以前作登場主角之一「Aiko 愛子」擔綱，講述過去嘅強敵再度出現，逼佢面對已經放低嘅過去。

遊戲主要玩法係操控一群專業殺手，先觀察敵人，掌握佢哋嘅慣性、移動路徑、換班間隔等資訊，然後把握時機喺數十個敵人中暗殺目標而不被發現。當中手段可以係單人躲於牆角暗殺、落陷阱、毒藥等等，亦可以設定其他隊員吸引敵人注意力、同時擊殺等技巧應付複數敵人。無論使用邊種方色都無一個固定玩法，因為呢類遊戲最吸引人嘅就係高度自由度以及高度戰略性。

遊戲中會有五位能力不同角色，主角女忍者愛子擁有變裝技能，可變成藝伎接近敵人吸引注意；使用刀劍與手裡劍嘅忍者隼人遠近皆可殺敵；力大無窮嘅武士無限可直接擊殺有重甲嘅武士；孤兒小雪擅長設置陷阱；拓馬可作出長距離狙擊。充分利用各角色能力，就可以玩出極華麗嘅連續殺人技巧。

《暗影戰術：幕府之刃～愛子的抉擇》將於 12 月 7 日發售，對應平台為 PC Steam，支援繁體中文。內容將收錄三種類型主線任務，另外仲會有三個支線任，雖然任務數量唔多，但係每個任務都有三個難度，根據往績就算普通難度已經幾難玩下，適合鍾意挑戰難度嘅玩家。另外雖然無玩過前作都可以獨立遊玩，但係為更為了解角色以及故事，製作團隊仍然建議大家玩返前作《暗影戰術：幕府之刃》（Keep 住壓到性好評）。亦因為咁，所以由即日到 11 月 17 日可以 1折購入前作，盛惠 HKD $21.90 極之抵玩。