今次同大家介紹嘅小品遊戲《Spermicide》，本質係一隻射擊遊戲，不過主題就非常特別。玩家扮演守護卵子嘅「守門人」，抵擋數以億計嘅精蟲「達陣」。雖然整體美術簡單，但係表達清晰，淨係望住個畫面都覺得一陣「精」味，超正！

《Spermicide》由獨立開發者 Frank Bondietti III 製作，係一款彈幕射擊遊戲，採用俯視視角。遊戲中玩家扮演「殺精劑」發射器，任務好簡單，就係阻止所有精子接觸卵子，避免懷孕。雖然精子數量多到好似無限咁，但係畫面左上其實有顯示剩餘精子數目（數以千計），總有殺晒嘅一日。雖然數目極多，幸好精子移動速度慢，亦無攻擊判定，可以安心掃射。

遊戲中途會出現各種升級道具，當中包括自動射擊砲塔，佈置得越多對戰鬥就越有利。另外喺操作方面，發射器係有移動慣性，類似駕駛船隻咁需要時間調整移動路徑，無得話停就停。好在四周牆壁會將玩家「反彈」，就算失去控制都唔會死亡。

除咗殺精守卵子模式，另外仲有「Be The Sperm」模式，於此模式玩家將扮演數以百萬計精子中的一粒，目標自然係接觸卵子「達陣」。角色掉轉，身為精子嘅你要突破砲塔群突圍而出，都有返咁上下難度。

《Spermicide》已於 10 月 24 日推出，對應平台為 PC Steam，售價 HKD $6.00。