類銀河惡魔城遊戲通常都係用固定角色，好少話有得比你揀職業。預定於下年推出嘅作品《Souldiers》就係一款有得揀職業嘅類銀河惡魔城遊戲，而且各職業間定位同招式等等都有頗大分別，真係比到玩家唔同嘅感覺，值得留意。

《Souldiers》由獨立開發商 Retro Forge Games 製作，係一款類銀河惡魔城遊戲。遊戲講述玩家與同袍出外征戰時，意外被帶到死人與活人之間嘅無秩序世界「蓋亞大地」，為咗離開呢個地方，與同袍們將為自由而戰。

本作精髓在於有職業選擇，遊戲中有三個職業：擅長近戰攻擊，攻守平衡嘅偵察兵；擅長中遠距離戰鬥，以多姿多彩箭術殺的嘅弓箭手；擁有各式各樣攻擊及輔助魔法嘅女巫。三位角色各有自己獨有招式及特長，例如偵察兵可以用盾、女巫可以創造圍繞於身邊嘅結界，有減慢敵人子彈速度效果等等，玩法多樣，而所有角色都有二段跳及空中衝刺，所以基本操作都係共通的。另外，隨遊戲推進，玩家可以使用技能樹令角色成長，解鎖更多技能。

「蓋亞大地」地圖設計以中心點向外蔓延而成為一個巨大地圖，周邊有毒沼澤、遺跡、廢棄花園、乾旱沙漠、熔岩地帶等區域，每個區域都有 Boss 打，當中更有需要解謎嘅秘道，遊玩元素豐富。

《Souldiers》預計於 2022 年春季上市，對應平台為 Nintendo Switch 及 PC Steam。