由知名遊戲《上古卷軸V：無界天際》（The Elder Scrolls V：Skyrim）所衍生嘅作品《The Forgotten City》（遺忘之城）推出咗幾個月，不但得到玩家一致好評（Steam 上有「壓到性好評」），更橫掃一大堆獎項以及得到多個外媒接近滿分評分（同時入圍今年「Golden Joystick Awards」）。經過實際遊玩後，我哋編輯部都認為係一款非常出色嘅遊戲，仲即將納入 Game Pass 內容，屬今年必玩遊戲。

《The Forgotten City》（遺忘之城）本身係《上古卷軸V：無界天際》入面知名 MOD 之一，之後由 Modern Storyteller 三人小組歷時四年開發，變成一款獨立作品。分類係角色扮演推理冒險遊戲，採用第一身視點，開放世界。遊戲講述了一個現代人穿越至二千年前嘅古羅馬小鎮，呢度有一班居民，佢地活在一個叫做「黃金法則」嘅系統下，即係只要一人犯罪所有人都會變成金子死亡，居民生活於恐懼之中，並時刻互相監視。玩家可利用每日嘅時間重置，重複向居民詢問情報、探索並解開謎題，逐步揭開所有謎團。

玩家需要認識城市中每個人，由佢地口中套中更多資訊，並且喺盡量不犯罪同時，去了解更多黃金法則嘅祕密。遊戲中雖然有動作成份（質素唔輸比一般動作遊戲），但主力都係透過談話、探索去解謎。整體謎題難度唔高，但係就好考記性，例如自己要推敲要點做，會產生咩影響、NPC 可以做咩事情、有咩地方要去、幾時啟動時間輪迴等等，特別係遊戲中唔會有太多提示。

遊玩時數適中，由頭至破關大約需要八至十個小時左右，有四個結局。製作團隊巧妙地將宗教同哲學融合，以大家熟悉嘅神話故事切入，令大家探討是非，而且 NPC 嘅對話文本製作用心，會令玩家反思，感覺 NPC 都係有血有肉，絕非平時 Skip 晒果堆廢話可比。

《The Forgotten City》（遺忘之城）已經推出，對應平台為 Xbox Series X|S、Xbox One、PS5、PS4、Nintendo Switch、PC Steam & Window。另外本作會於 10 月 28 日被納入 Game Pass 之列，有訂閱的玩家可免費遊玩。