喺每一個平台都大獲好評嘅 Roguelite 作品《死亡細胞》（Dead Cells）令大家留下深刻印象，曾擔任該作首席設計師 Sébastien Benard，成立自己工作室之後發表嘅新作《Nuclear Blaze》已經喺日前推出，唔再打怪改為救火，但係作品同樣優秀而且仲得到「極度好評」評價，加上超平價格，極之抵玩！

《Nuclear Blaze》由 Deepnight Games 開發，係一款橫向動作冒險遊戲。玩家將扮演一位消防員，被空投至一個祕密軍事設施，不過因為火災關係已經變成超巨大火場。玩家要喺呢個地方調查以及尋找生還者，並且小心避開軍事設施中各種未知意外前進。

雖然主要玩法係用水開路滅火前進，但係作品加入大量現實元素，例如火勢會倒灌、牆壁會倒塌、易燃物會爆炸等等，而玩家手上嘅水並非無限，要隨時搵定水資源補充，亦要運用防火牆、開啟灑水系統甚至要切斷電源系統避免意外等，大量細節令遊戲變得極之困難。順帶一提，本作唔係 Roguelite 類型，亦無得揀難度，而且官方默認設置為非常困難，極有挑戰性。

難度雖高，不過為咗令小朋友都玩到，遊戲特設「Kid Mode」，專為年輕玩家設計（其實係 for 製作人三歲小朋友而設）。喺呢個模式下更易於探索、水會自動瞄準、角色不會死亡、無限水量，更有大量直升機同消防車，因為小朋友通常都好鍾意佢地。

《Nuclear Blaze》已於 10 月 18 日推出，對應平台為 PC Steam。