今時今日遊戲機中心（即機舖）已經係黃昏行業，碩果僅存嘅機舖大多都轉型做「打魚」、「推銀」場，但其實以前機舖入面係好多種類遊戲，而且賽車類遊戲往往會有大量觀眾欣賞，好不熱鬧。新遊戲《Arcade Tycoon: Simulation》就係玩模擬九十年代遊樂場，懷緬一下昔日感覺。

《Arcade Tycoon: Simulation》由 Squidpunch Studios 及 Vincent Corporation Ltd 開發，係一款模擬經營遊戲，採用像素風格美術。玩法同一般模擬經營遊戲差唔多，主要都係透過購買及設置各種街機同設施賺取收入，當然仲要管理麻煩嘅員工同令客人玩到樂而忘返，而製作團隊亦都表明本作設計靈感來自《Two Point Hospital》、《Prison Architect》同埋《Megaquarium》。

雖然話就話係玩模擬機舖，不過因為係外國製作，比起香港舊式機舖，更接近有設置街機嘅冒險樂園，亦即係九十年代外國機舖 Setting。玩家除咗街機之外，仲可以擺氣墊球、夾公仔機、鬼屋等設施，亦可以自訂地板、牆壁等，創做不同外觀嘅主題區域。

遊戲中會出現貧民窟、博物館、主題公園、海盜船、購物中心及鬧鬼酒店等十二個舞台，員工們亦會有各種能力及需求。當然，模擬經營遊戲最過癮嘅地方係點樣「玩」啲客人，喺本作中會出現漏電、爆炸等意外，大家識玩啦。

《Arcade Tycoon: Simulation》已經推出，對應平台為 PC Steam。