早前推出嘅《生化危機》第八集《Resident Evil Village》叫好又叫座（相關評測文章），令玩家們對系列重拾信心，特別係新角色巨大吸血鬼夫人「蒂米特雷斯庫」充滿話題性（雖然戲份唔多）。一隻受歡迎嘅遊戲自然會有人將佢做更多嘅創作，《Residentvania》就係一款以《Resident Evil Village》為藍本改做嘅遊戲，仲可以用第二種方式再次與巨大吸血鬼夫人對決，爽！
《Residentvania》由玩家 OcO 獨立製作，係一款類惡魔城橫向動作遊戲。根據作者本人所講，呢款遊戲用咗兩個月時間開發，主要係將原作變成平面惡魔城風格，內容暫時就由城堡入口到與吸血鬼夫人對決為止，中間會出現神秘商人公爵、雜卒喪屍以及「女兒」。有趣嘅係原作要打爆玻璃攻擊「女兒」嘅玩法依然有保留，即使係平面玩法亦都無偷工減料。
遊戲操作非常簡單，都係移動、跳、小刀攻擊同開槍射擊幾個動作，亦不乏打爆燭台跌子彈、打爆部份牆壁有隱藏道具等惡魔城元素。另外，本作仲支援使用 Xbox 手制遊玩，以一款只有 33MB 容量遊戲黎講，算係咁。
《Residentvania》已經推出，有興趣嘅朋友可到 itch.io 下載，費用全免。
回帶相關文章：
【遊戲評測】元素豐富劇情吸引 《Resident Evil Village》重新出發的新一集生化危機
動漫電玩宅，極愛金田一系列，擅長動作及策略遊戲