湯馬士小火車係唔少人嘅童年陰影，佢用詭異笑容一直望住你，望耐少少都覺得心寒，而且多次以 Mod 嘅形式出現於各大遊戲入面，奠定恐怖大王之名。將於明年推出嘅《Choo-Choo Charles》就明顯影射湯馬士小火車，用返佢真實嘅面貌追殺玩家。早前官方推出宣傳片，睇落質素唔錯，備受外國玩家期待。

《Choo-Choo Charles》由 Two Star Games 開發，係一款生存恐怖射擊遊戲，採用第一身視點，開放世界。暫時未知遊戲故事係乜，淨係知道喺呢個世界入面有隻叫做「Charles」嘅火車怪物，無人知佢黎自邊度，淨係知佢會食人。玩家嘅任務就係消滅呢架「小火車」，並搭乘自己嘅「黃色小火車」去各區幫助市民。

遊戲採用開放世界，不過玩家移動嘅手段主要係用「黃色小火車」，但係架車因為太廢成日都會壞。呢個時候就要落車尋找材料去修理及強化架小火車，或者移除路軌上嘅障礙物、轉線等等。不過以上動作都要安靜地做，因為你唔知「Charles」會幾時出黎殺你。順帶一提，小火車後方有支機關槍，傷害力不大但持續攻擊都可以擊退「Charles」……一陣。

《Choo-Choo Charles》預計於 2022 年 12 月 9 日發售，對應平台為 PC Steam。