FPS 經典遊戲《CS》系列可以話係無數人嘅童年回憶，遊戲中嘅「Dust2」就更加係經典中嘅經典，話佢係最具代表性地圖亦絕不為過。呢幅地圖最大特色係扮演恐怖分子一方喺出生點會直接見到反恐小組必經之路，所以多年來呢個地圖都經常會出現「中路對狙」情況，慢慢更演變為呢幅地圖嘅樂趣。不過呢個情況已經步入歷史，因為經歷多年後 Valve 喺最近嘅《CS：GO》更新中修改恐怖分子出生點。

喺最近《CS：GO》更新中入面，Valve 修改咗「Dust2」呢張地圖恐怖份子一方玩家出生點，令到反恐小組一方開波時被爆頭機會降低，從而增加地圖雙方平衡性，但亦都令到「中門對狙」呢個經典傳統消失。老實講，雖然初頭平衡度的確係一個大問題，但經歷多年玩家們都已經習慣，對狙玩法亦都係趣味之一，從此消失未免令人惋惜。

另外，《CS：GO》雖然係一款超有年份嘅遊戲，但最近嘅大更新《CS:GO – 猛潮行動》不但加入新地圖、新玩法，由 9 月 22 日推出後更持續維持於銷售排行榜榜首，同時上線人數更遠遠拋離《PUBG: BATTLEGROUNDS》、《Apex Legends》等其他 FPS 類型遊戲 2 – 3 倍之多，仍然穩佔最受歡迎射擊遊戲首位，非常利害。