遊戲發行商 THQ Nordic 宣佈正在開發《Outcast》續作《Outcast 2: A New Beginning》，作品預定對應 Xbox Series X｜S、PS5 及 PC Steam 平台，發售日未定。

《Outcast 2: A New Beginning》為 1999 年推出遊戲《Outcast》正式續作，由 Appeal 工作室開發。《Outcast》當年為一隻 PC 遊戲，係當時先行使用 3D 模組開發嘅開放世界遊戲之一，後來遊戲於 2017 年曾經推出 Remake 版本《Outcast – Second Contact》。今次嘅續作將會繼續由 Appeal 工作室負責開發。

續作主角與第一集一樣為 Cutter Slade。身為特種部隊前成員嘅 Cutter Slade，於上集當中，為了解除地球滅亡嘅危機，被派遣往異星球「Adelphaz」；而今集玩家嘅任務就係要守護「Adelphaz」。

「Adelphaz」上面住有名為「Talan」嘅種族，為擁有高度智慧嘅生命體，亦都係星球嘅守護者；佢地與主角面對外來侵略者嘅威脅，於是要重投到戰鬥當中。侵略者為機械人與無人機組成嘅軍隊，而佢地嘅出現，似乎與主角於《Outcast》曾經面對過嘅任務有所關連。

玩家於遊戲當中將擁有高度活動能力，例如可利用噴氣背包、空中衝刺及滑翔等等方式於星球上面移動。作為一隻次世代嘅開放世界作品，星球「Adelphaz」上面亦都充滿住供玩家探索嘅神秘區域，例如係歷史遺跡、神殿、森林等等，亦會見到唔同原住民建立嘅村莊。

玩家同時會配備一把具有多形態及能力嘅槍械，可以進行盾防、亦可以作近戰或遙距攻擊。武器日後可於遊戲中獲得道具進行改裝或強化，按目前消息睇黎，《Outcast 2: A New Beginning》為一隻元素豐富嘅開放世界科幻作品，不過目前遊戲尚在開發初期，相信日後尚有唔少改動空間。

《Outcast 2: A New Beginning》預定對應 Xbox Series X｜S、PS5 及 PC Steam 平台，發售日未定。有新消息會再為大家報導。