大家玩《俄羅斯方塊》（Tetris）果陣，唔知有無試過啲方塊跌得越黎越快，但係就等極都唔出你想要嘅方塊（多數都係長條），然後不停跌 2×2 或者 S 形，讀心能力一流。喺十年前就有位程式設計師，因為有過以上經歷，心諗反正都係不如將「讀心」玩到極致，開發出極嘔心版俄羅斯方塊《Hatetris》，連世界冠軍都搞佢唔掂！
《Hatetris》使用 JavaScript 編寫，並且喺 GitHub 上公開源代碼，作者亦都有 Keep 住更新，而且最近喺外國又再度引起討論。《Hatetris》同傳統俄羅斯方塊最大分別係佢有特別嘅 AI，會測試所有可能形狀所有可能位置，再因應情況跌粒最乞人憎嘅方塊俾你，如果所有位置都差唔多的話，就會不停跌 S 或者 Z，另外佢係無重力，即係所有方塊唔會自動跌落黎，要按下先會郁一格，玩幾慢都得，不過你玩落就發現無論幾慢都係無意思。
點解咁難？如果淨係跌 S 或者 Z 其實唔難玩，因為你點都可以食到一行，最麻煩係佢會因應情況跌其他形狀，只要符合條件的話全數七種方塊都會出現，不過我就玩唔到出黎，試咗好多場我最叻都係得 2 行，不過睇返世界紀錄都係得 31 行（2017 年維持至今），咁計都唔算好差丫！
《Hatetris》畫面極之簡陋，只需要用瀏覽器就玩到，但係有嘅係滿滿嘅惡意，想挑戰下自己 eq 的話，不妨試下。
動漫電玩宅，極愛金田一系列，擅長動作及策略遊戲