今次為大家介紹嘅遊戲喺公佈初期已經備受注目，雖然係一款獨立遊戲，但係精緻嘅像素世界加上聖劍傳說式玩法，令人難忘。經歷六年開發時間，《風來之國》（Eastward）終於正式推出，短時間內已累積大量好評，值得一試。

《風來之國》由獨立遊戲工作室 Pixpil 開發，係一款動作角色扮演遊戲，採用開放世界。遊戲故事講述，未來世界經歷一場神秘大災害，將一切摧毀吞噬，有部份人幸運地進入地底躲避逃過一劫。多年後由地下世界前往地上風之國嘅大叔「約翰」與小女孩「姍」，面對未知嘅世界及命運，故事由此展開。

本作使用雙主角系統，玩家可自由選擇使用「砰砰槍」、「火焰權杖」、「平底鍋」嘅約翰，又或者使用遠程魔法能量球嘅姍作戰，當中包括充滿特色嘅 Boss 戰，好多時仲要動腦筋諗點打，有啲似《薩爾達傳說》系列。

雙主角系統除咗戰鬥外，喺迷宮探索解謎時亦會用到。另外喺小鎮上有形形色色嘅 NPC，由佢地所帶出黎嘅故事都幾有趣，加上喺野外探索時獲得嘅食材，由約翰烹調後會變成補品或者輔助道具，遊玩元素都頗豐富，呢個價錢黎講算係抵玩。

《風來之國》已於 9 月 16 日推出，對應平台為 Nintendo Switch 及 PC Steam。