動作遊戲一直都係極受歡迎嘅遊戲種類，一直以來只要美術、打擊感、玩法呢幾點做得好，基本上隻遊戲都唔會差得去邊。隨時代變化，大家開始追求更多變化，有喺戰鬥系統上下功夫（《羅德斯島戰記》）；有喺劇情上大幅強化（《Hades》）；有加入  Roguelite 元素令每次遊玩都有新鮮感。今次介紹嘅遊戲《Metallic Child》就係有劇情有 Roguelite，同時喺戰鬥系統上加入新元素，鍾意動作遊戲嘅真係咪走寶！

《Metallic Child》由韓國獨立團隊 Studio HG 開發，係一款有 Roguelite 元素動作砍殺類遊戲 。遊戲故事講述 2086 年，太空站進行各種研究實驗，艾琳博士為咗幫助不育嘅家庭，特別研究擁有與人類相同思想與情感嘅機械人，而第一個成品就係主角洛娜，但係佢有一個缺點，就係以人類角度思考嘅計算成本太高，導致整個項目失敗，亦即係只有洛娜一台有自我思考能力。

隨時間推進，太空站政策發生改變，此後製作嘅所有機械人（Metallic Child）都只有戰鬥用途。突然，太空站發生叛亂，所有機械人對人類發起襲擊，太空站失去控制即將墜落地球，失去自我維持系統嘅洛娜幸運地接收到由地球發出嘅遠端控制指令，於是擁有操作權限嘅玩家就協助洛娜阻止太空站墜落。

遊戲採用 45 度俯瞰視角進行（類似《Hades》），因為洛娜只係一般機械人，要透過擊敗戰鬥機械人奪取核心解鎖技能（《洛克人》咁）。玩家可自由選擇攻略邊隻戰鬥機械人，進入關卡後會隨機出現敵方機械人，重複戰鬥及搜索後就會見到 Boss（部份戰鬥會變成橫向動作），戰勝後就可奪得核心。

戰鬥部份有三種對應裝備：手套、錘子、劍盾，分別對應唔同嘅普通攻擊，以及使用防禦或翻滾，當中最特別嘅係本作加入強力抓取及投擲，可將敵人抓取後當成盾牌使用，又可以將敵人丟埋牆璧做成傷害，善用的話係極之爽快兼過癮。

《Metallic Child》已於 9 月 16 推出，對應平台為 PS4、Nintendo Switch 及 PC Steam，對應繁體中文。