即將於 2021 年 9 月 24 日推出的《審判之逝：湮滅的記憶》的 Demo 試玩版本已經上架，是次試玩版目前只對應 PS4｜5 版本，不過正式版則同時對應 Xbox One｜Series X｜S 及 PS4｜5 兩個主機平台。

作為 2018 年好評動作遊戲《審判之眼：死神的遺言》嘅續作，《審判之逝：湮滅的記憶》一直備受玩家關注，除咗「木村拓哉」擔任主角繼續為遊戲焦點之一，遊戲本身嘅劇本亦為令人期待的要點。試玩版內容為遊戲序章到第一章嘅部份，存檔可以過繼到正式版本當中。

玩家於《審判之逝：湮滅的記憶》試玩版中可以感受查案部份嘅幾個重點，例如跟蹤、觀察、潛入；亦有大量武打鏡頭比玩家感受主角「八神」嘅戰鬥風格。作為前律師・現役偵探的「八神」，於故事中經常會接到各式各樣的案件，因此「偵查」係非常重要嘅部份。

於跟蹤過程當中，玩家必須要避免過度接近「敵人」被佢發現，而遊戲裡面嘅被跟蹤對像，偶爾亦會行回頭路、或者係發現八神嘅存在。玩家呢個時候需要使用「匿蹤」技巧，例如係對方回頭望時，可以匿去佢視線範圍以外、或者扮玩手機、綁鞋帶等等動作，去避免增加對方嘅戒心。一旦對方警戒升至最高點，是次跟蹤就為之失敗了。

躲於便利店貨架後面，去偷拍對方最清晰嘅照片作為證據

當跟蹤對象進入特定場所，八神如果不能從正門進入，就必須以「潛入」方式進入場所。「潛入」路線必須隱蔽，不能為路人所察覺，所以好多時候需要從後門、或者攀爬大廈喉管或冷氣機槽等「踏腳石」去進入場所。

今集遊戲裡面，八神嘅體能靈活度比上集更為提昇，例如可以於牆壁邊緣垂吊、於高處狹窄地方靠牆移動（有時仲會見到貓，或者白鴿群受驚而急速飛走，都係今集更為像真嘅環境設定）、甚至可以於有高低差距嘅地方進行躍動等等，都係今集體能動作嘅鮮明要素。

特定地方需要事先搵定潛入方式及路線，上圖展示為垂吊移動嘅方式

於高窄處貼牆移動

避免驚動敵人的潛入作戰，遊戲會出現提示，示意玩家可躲於紙箱後（橙色光點）就可避免被敵人察覺

戰鬥部份貫徹「人龍工作室」嘅味道，同上集一樣，「八神」嘅武打風格包括可較大範圍擊飛敵人嘅「圓舞」，以及拳腳速度快速的「一閃」，玩家於戰鬥當中可隨時切換風格，更可以隨便抓起周遭物品對敵人進行攻擊，呢種傳統「人龍」式嘅戰鬥，相信係唔少《人中之龍》系列 Fans 懷念嘅部份。

備受玩家愛戴的「破壞公物作戰方式」

試玩版提供「一閃」及「圓舞」兩種戰鬥風格，正式版當中，仲會加入今集全新風格「流」。「流」可以話係「摔技」（即將敵人造成失衝、再將佢用力摔落地面造成傷害嘅強力招式）嘅強化版本，同時擅於解除敵人武裝。「流」亦於防禦部份有加乘作用。面對持有武器嘅敵人時、或者敵眾我寡需要謹慎作戰時，「流」絕對係玩家進行戰鬥嘅優先之選。

非試玩版畫面：「流」的摔技表現。玩家如不能接受見血，可於「設定」中選擇「爆血」嘅多寡程度。

非試玩版畫面：「流」有格檔能力加乘

雖然同《人中之龍》故事唔同，不過，《審判之逝：湮滅的記憶》與《人中之龍》享用相同世界觀及時間線。例如於 2020 年發售嘅《人中之龍 7》裡面，「東城會」六代目堂島大吾與「近江聯合」若頭渡瀨勝宣佈兩個組織同時解散，呢個情節發展，相信人龍系列嘅玩家依然記憶猶新。

黎到《審判之逝：湮滅的記憶》裡面，故事時間點正好就係喺「東城會」解散之後，所以於試玩版中，八神遇上自稱「東城會」的小混混，心水清嘅玩家或者都會同我一樣會心微笑：騙子！係騙子！

由於想要貫徹傳統「人龍」風格，所以於系統及操作上面，《審判之逝：湮滅的記憶》並未作出太多更改或變動，所以著眼點絕對係是次嘅主線劇本上面。

神秘死體！

虛報的火災、死亡而久的屍體、因為風化罪行而被判案的前任警察、及他在法庭上面作出的微妙言語……試玩版在此留下一條引人入勝嘅故事伏線，留待玩家於正式版時慢慢發掘。

「人龍工作室」出品遊戲仲有另外一個吸引要點，就係極為像真嘅日本街頭。玩家於《審判之逝：湮滅的記憶》當中，可以穿梭於「陪住大家長大」嘅神室町，亦有部份劇情會去到《人中之龍 7》嘅舞台異人町。於街頭進行任務、與 NPC 互動、進行各種小遊戲與收集任務，都係遊戲豐富元素之一。

試玩版當中，玩家暫時未有機會試玩小遊戲，亦未能接觸是次作品重要場景「誠稜高中校園」；不過人龍工作室今次一樣於呢啲支線部份落足心思，例如今次加入嘅高校社團元素，人物設定與學校社團等等都充滿住玩味（人龍式幽默），相信都會係各位玩家於今作當中可期待嘅趣旨之一。

人龍式幽默：大學生居然沉迷傳統日式賭博！

試玩版本目前已登錄 PS Store，想率先感受《審判之逝：湮滅的記憶》操作感覺及初期劇情嘅玩家歡迎下載試玩。遊戲正式版本仲有玉木宏、山本耕史等演員加盟主線劇情，正式版將對應 Xbox One｜Series X｜S 及 PS4｜5，於 2021 年 9 月 24 日推出。

【演出】木村拓哉　玉木宏　山本耕史　光石研／中尾彬
【總監】名越稔洋 【劇本】古田剛志

【商品概要】

商品名稱 : 審判之逝：湮滅的記憶
遊戲平台 : Xbox One｜Series X｜S、PS4｜5
※ Xbox One、Xbox Series X｜S 僅販售數位版
發售日期 : 預定 2021 年 9 月 24 日（五）發售
價格 : 一般版・數位版：台灣 1,790 NTD 香港 488 HKD
數位豪華版：台灣 2,590 NTD 香港 698 HKD
※Xbox Series X｜S／Xbox One 版僅推出數位版，並未計畫推出實體版遊戲。
遊戲語言 : 繁體中文、簡體中文、英文字幕／日語・英語語音
遊戲類別 : 法庭劇動作遊戲
遊玩人數 : 1人
銷售 : 世雅股份有限公司
遊戲分級 : 限制級
版權標記 : ©SEGA