即時戰術（Real-Time Tactics）類型遊戲現時已經係非主流類型，但係以前曾經風光，例如《Commandos》系列、《Desperados》系列等等，後者上年更推出新作（相關評測文章），證明仍有一定市場。黎緊會有一款以二戰背景為題材嘅潛行新作《War Mongrels》，仲少見地有合作模式，如果你都係鍾意呢類遊戲嘅玩家就要留意啦。

《War Mongrels》由波蘭工作室 Destructive Creations 開發，係一款即時戰術潛行遊戲，支援二人線上合作。「即時戰術遊戲」（RTT）對現時玩家黎講可能比較陌生，佢係「即時戰略遊戲」（RTS）衍生類型。以實時方式喺模擬戰場環境入面，對人物或部隊進行戰術指揮。RTT 同 RTS 最大分別就係無需採集資源、唔洗起野，比較專注於兵種/角色運用，以及戰術運用。

遊戲背景以二次世界大戰歐洲戰場東方戰線為背景，根據官方資訊，本作係於二戰歷史專家監督下，根據真實事件同軼事創作。故事講述主角被政治宣傳所迷惑，未諗清楚就參軍並參與由納粹所引發嘅國際衝突中，當見證戰爭殘酷一面後，決定反抗納粹，阻止更多無意義嘅殺戮事件。

遊戲中玩家一開始將扮演德國軍人，體驗由逃兵成為游擊隊嘅歷程。當玩家招募到更多志同道合角色加入後，隊伍將不斷擴大。由於每個角色都有治療、滲透作戰等獨有技能，要喺適當時候運用合適角色，因應任務需求而改變團隊組合，有時連過關形式都可以自己決定，所有事情都取決於你嘅策略。

另外，本作最令人意外嘅係支援二人連線合作，一般 RTT 類遊戲都係單機遊戲，變成多人合作會係易咗定難咗真係好難估計。加上本作嘅主旨並唔係殺敵，而係點樣拯救他人、盡力存活、避免無辜人民傷亡，玩起黎自然更加困難。

《War Mongrels》將於 10 月 19 日，對應平台為 PC Steam 及 Epic Games Store（支援繁體中文），至於 Xbox Series X|S、Xbox One、PS5、PS4 版本則於稍後公佈推出日期。