【遊戲新聞】恐怖遊戲大作新片《The Outlast Trials》刺激感十足片中驚現抵抗手段

作為恐怖遊戲大作《Outlast》系列，最新作品《The Outlast Trials》（絕命精神病院：試煉）自 2019 年發表後就備受期待，不過一直都無乜聲氣，舊年出過條片之後又靜晒。日前終於有新片推出，影片表達新作刺激感十足之餘，仲驚見首次出現反擊手段，令人頗感興奮！

《The Outlast Trials》係一款生存恐怖遊戲，採用第一身視點，最大支援四人連線遊玩，為《Outlast》系列第三部作品，係前兩集嘅前傳。今次遊戲時間點將會回到冷戰時期，劇情講述大量人到 Murkoff 公司進行招募測試，實際入面係洗腦與精神控制實驗場所，入去班人被迫經歷慘無人道嘅折磨同改造，作為玩家嘅目標自然係要逃出呢個地方。

預告中可以見到，玩家被大量改造人追殺，玩家一方有合作元素，今次仲可以用道具擊退敵人，甚至可設置地雷攻擊敵人，有別於以往集數無反擊戰鬥手段。另外，影片中所見場景光度好足夠，似乎唔需要要搵電池先睇到野（之前影片有講過玩家因手術「強化」關係自帶夜視鏡）。至於遊戲長度，根據開發商 Red Barrels 嘅資訊，今集奔向自由之旅將會係漫長的，就好似電視劇一樣，相信長度唔會短得邊。